ဖေဖော်ဝါရီလ ၉ ရက်နေ့က ပြည်ထောင်စု အဆင့် ငြိမ်းချမ်းရေး ဆွေးနွေးပွဲ အဖွဲ့ခေါင်းဆောင် တောင်သာမြို့နယ် ပြည်သူ့ လွှတ်တော် ကိုယ်စားလှယ် ဦးအောင်သောင်းနှင့် အဖွဲ့ဝင်များနှင့် ကရင်ပြည်နယ် ငြိမ်းချမ်းရေး ဆွေးနွေးရေး အဖွဲ့နှင့် KNU/ KNLA ငြိမ်းချမ်းရေး ကောင်စီ ဥက္ကဌ ဦးစောဌေးမောင်(ခ) ဦးထိန်မောင် ဦးဆောင်သော ငြိမ်းချမ်းရေး ဖော်ဆောင်ရေး အဖွဲ့တို့ နေပြည်တော်တွင် ငြိမ်းချမ်းရေး တွေ့ဆုံ ဆွေးနွေးပွဲကို ရင်းနှီး ပွင့်လင်းစွာ ပြုလုပ်ခဲ့ကြပြီး အောက်ပါ နှစ်ဦးနှစ်ဖက် သဘော တူညီချက် (၇)ချက်ကို လက်မှတ် ရေးထိုးကာ အပြန်အလှန် လဲလှယ်ခဲ့ကြသည် -

(၁)
တပ်မတော်နှင့် KNU/ KNLA ငြိမ်းချမ်းရေးကောင်စီ တို့အကြားလက်ရှိတည်ရှိနေသော ငြိမ်းချမ်းရေးကို ဆက်လက် ထိန်းသိမ်းမည်။
(၂)
KNU/ KNLA ငြိမ်းချမ်းရေး ကောင်စီဝင်များကို (မဲလ၊ ထို့ကော်ကိုး) နေရာတွင် အခြေပြု နေထိုင်ရန်
(၃)
နှစ်ဖက် အပြန်အလှန် ပြောဆို ဆက်ဆံ ဆွေးနွေးမှုများ ပြုလုပ် နိုင်ရန်အတွက် နှစ်ဖက် သဘောတူညီ သော နေရာများတွင် နှစ်ဖက် သဘော တူညီသော ပုဂ္ဂိုလ်များဖြင့် ဆက်ဆံရေးဌာန၊ စခန်းများကို ထူထောင်မည်။ ကုမ္ပဏီ၏ စီးပွားရေး၊ ဆက်ဆံရေးရုံးများကို ဘားအံ၊ မြ၀တီ၊ ဘုရားသုံးဆူ၊ ကော့ကရိတ်၊ မောတောင်၊ ကော့သောင်းတို့တွင် ထားရှိမည်။
(၄)
နှစ်ဖက် သဘော တူညီထားသော နယ်မြေ များမှအပ နယ်မြေ ကျော်လွန် လက်နက် ကိုင်ဆောင် သွားလာမှု များကို နှစ်ဖက် ကြိုတင် ညှိနှိုင်းပြီး ဆောင်ရွက်မည်။
(၅)
ပြည်ထောင်စု အဆင့် ငြိမ်းချမ်းရေး ဆွေးနွေးရေး အဖွဲ့နှင့် KNU/ KNLA ငြိမ်းချမ်းရေး ကောင်စီမှ အဆင့်မြင့် ငြိမ်းချမ်းရေး ဆွေးနွေးရေး အဖွဲ့တို့သည် နှစ်ဖက် သဘောတူညီေ သာနေရာ၊ သဘော တူညီသော အချိန်ကာလတွင် တွေ့ဆုံ၍ နယ်မြေ တည်ငြိမ် အေးချမ်းရေး၊ ဖွံ့ဖြိုးတိုးတက်ရေး၊ တပ်ဖွဲ့ဝင် များ အခြေချနေထိုင်၊ လုပ်ကိုင် စားသောက် နိုင်ရေးနှင့် ထာဝရ ငြိမ်းချမ်းရေး ရရှိသည်အထိ ဆက်လက် ဆွေးနွေးရန် သဘောတူသည်။
(၆)
ပဏာမ ငြိမ်းချမ်းရေး ဆောင်ရွက် ပြီးသည့်နောက်တွင် တစ်ဖက်နိုင်ငံ၌ ရောက်ရှိနေသော တိုင်းရင်းသား တို့၏ ပြန်လည် ၀င်ရောက် အခြေချ နေထိုင်မည့် နေရာတွင် ၎င်းတို့၏ စားဝတ်နေရေး၊ ပညာရေး၊ ကျန်းမာရေး၊ လမ်းပန်းဆက်သွယ်ရေး၊ ရေ၊ မီး အစရှိသည့် ဖွံ့ဖြိုးရေး လုပ်ငန်းများ အတွက် အလျင်အမြန် အကောင်အထည်ဖော် ဆောင်ရွက် နိုင်ရေးအတွက် နိုင်ငံတော်မှ ခွင့်ပြု၍ ကိုယ်ထူ ကိုယ်ထ လုပ်ဆောင် ခွင့်ကို ပံ့ပိုးသွားမည်။
(၇)
KNU/ KNLA ငြိမ်းချမ်းရေး ကောင်စီမှ တင်ပြ ထားသော ငြိမ်းချမ်းရေး အဓိပ္ပာယ် ဖွင့်ဆိုချက် များအပေါ် မူအားဖြင့် သဘောတူ၍ နှစ်ဦးနှစ်ဖက်မှ ကြိုးပမ်းသွားမည် ဖြစ်ပါသည်ဟူ၍ ဖြစ်သည်။

ထို့ကြောင့် ဤသည်ကို ကြည့်ခြင်းအားဖြင့် ပြည်ထောင်စု သမ္မတ မြန်မာ နိုင်ငံတော်သည် ဒီမိုကရေစီ စနစ်သို့ အသွင်ကူး ပြောင်းပြီးသည့် အချိန်မှစပြီး ထင်သာ မြင်သာသော ပြုပြင် ပြောင်းလဲမှု များနှင့်အတူ တိုင်းရင်းသား လက်နက်ကိုင် အဖွဲ့များနှင့် အပစ်အခတ် ရပ်စဲပြီး ငြိမ်းချမ်းရေး ရယူနိုင်ခဲ့မှု များမှာလည်း နိုင်ငံတော် တည်ငြိမ် အေးချမ်းခြင်းရဲ့ အသီးအပွင့် များရရှိ ခံစားရစေရန် အတွက် နိုင်ငံတော် အစိုးရနဲ့အတူ ပြည်သူများ၊ တိုင်းရင်းသား များတို့က ပူးပေါင်းပါဝင် လုပ်ဆောင် သွားကြရမည် ဖြစ်သည်။ ထို့ကြောင့် ဤရေ ဤမြေ ဤ ပြည်ထောင်စုသည် တိုင်းရင်းသား အားလုံးနှင့် သက်ဆိုင်သည့် ရေမြေဖြစ် သည့်အလျောက် ပြည်ထောင်စုကြီး နိမ့်လျှော တိမ်မြုပ် ပျောက်ကွယ် မသွားရေး ကိုလည်း ပြည်ထောင်စု တိုင်းရင်းသား နိုင်ငံသားတိုင်း အားလုံး ၀ိုင်းဝန်း စောင့်ရှောက် ကာကွယ် သွားကြရမည် ဖြစ်ကြောင်း ရေးသား လိုက်ရပါသည်။
နေတာရာ

0 ဦးကဆွေးနွေးသွားပါတယ်..

Отправить комментарий