ပြီးခဲ့တဲ့ မြန်မာနိုင်ငံရဲ့ ကြားဖြတ်ရွေးကောက်ပွဲမှာ နိုင်ငံတကာနဲ့ ပြည်တွင်းက သတင်းမီဒီယာ တစ်ချို့ဟာ ကြားဖြတ်ရွေးကောက်ပွဲရဲ့ လွတ်လပ် တရားမျှတမှုကို ထိုးနှက်တိုက်ခိုက်ဖို့ ဆန္ဒမဲလက်မှတ်တွေမှာ ဖယောင်း သုတ်ထားတယ်ဆိုပြီး ပြည်သူကို သတင်းမှားနဲ့ လှည့်စားခဲ့ကြပါတယ်။ NLD အနေနဲ့လည်း ဖြစ်ပေါ်နေတဲ့ လက်ရှိအခြေအနေ တွေကို အသေအချာ သုံးသပ်လေ့လာခြင်းမရှိဘဲ မြှောက်စားပင့်စားတွေရဲ့ အလိုလိုက် အကြိုက်ဆောင်တဲ့ ကပ်ဖားရပ်ဖား စကားလုံးတွေကို တဖက်သတ်ဆွဲယူပြီး ပြည်ထောင်စု ရွေးကောက်ပွဲ ကော်မရှင်ကို တိုင်ကြားခဲ့ပါတယ်။ ပြသနာ တစ်ခုဖြစ်လာခဲ့ရင် နားနှစ်ဖက်နဲ့ အသေအချာ နားထောင် မျက်လုံးနှစ်လုံးနဲ့ စေ့စေ့စပ်စပ် ကြည့်လို့ ကိုယ်ပိုင်အသိနဲ့ မှန်ကန်မျှတအောင် ဝေဖန်ပိုင်းခြားပြီး သေချာမှ တစ်ဖက်သားကို စွတ်စွဲ ပြောဆိုသင့်ပါတယ်။ ဒါပေမယ့် NLD အနေနဲ့ ဒီစွတ်စွဲ တိုင်ကြားချက်မှာ နှစ်ဖက်မျှတတဲ့ အမြင်နဲ့ မကြည့်ဘဲ ကိုယ်ဘက်ကိုယ် ကြည့်တက်တဲ့ အမြင်တစ်ခုတည်းနဲ့ ကြည့်ပြီး တစ်ဖက်ကန်းအမြင်နဲ့ ပုတ်ခတ်စွတ်စွဲခဲ့ပါတယ်။ ပြည်ထောင်စု ရွေးကောက်ပွဲ ကော်မရှင်က ဖြစ်စဉ်ဖြစ်ပွားရာ ပုလဲ၊ မော်လမြိုင်၊ မြန်အောင်၊ မကွေး၊ တောင်တွင်းကြီး၊ ကော့မှူး၊ မင်္ဂလာတောင်ညွန့် မရမ်းကုန်း၊ ဒဂုံ(ဆိပ်ကမ်း)နဲ့ ကလော(အောင်ပန်း) မြို့နယ်တွေကို တိုင်းဒေသကြီး/ပြည်နယ်၊ ခရိုင်နှင့် မြို့နယ်ကော်မရှင် အဖွဲ့ခွဲများနှင့် သက်ဆိုင်ရာ ပါတီများမှ မြို့နယ်အဆင့် ဥက္ကဌ/ အတွင်းရေးမှူးများ ပါဝင်တဲ့ စုံစမ်းစစ်ဆေးရေး အဖွဲ့ဟာ မဲရုံအသီးသီးရှိ မဲပေးပြီးသည့် ဆန္ဒမဲလက်မှတ်များကိုပါ ဖွင့်ဖောက် စစ်ဆေးပြသ စေခဲ့ပါတယ်။ စစ်ဆေးတွေ့ရှိချက် ကတော့ တိုင်ကြားမှုဟာ အခြေအမြစ်မရှိတဲ့ သတင်းရင်းမြစ်ကို အခြေခံပြီး တိုင်ကြားထားတာကြောင့် မှန်မကန်စွတ်စွဲ တိုင်ကြားချက်သာ ဖြစ်ပါကြောင်း ဖော်ထုတ်နိုင်ခဲ့ပါတယ်။
NLD အနေနဲ့ မိမိနိုင်ငံရေး ဂုဏ်သိက္ခာကို မငဲ့ကွက်ဘဲ ပြည်သူအကြားမှာ ဒီလိုထင်ယောင်ထင်မှား ဖြစ်စေတဲ့ လုပ်ရပ်မျိုး ပြုလုပ်ခြင်းဟာ ပြည်သူ သတင်းမှိုင်းတိုက် ပေးလိုက်တာပဲ ဖြစ်ပါတယ်။ ကျမ်းသစ္စာ ကြိမ်ဆိုတဲ့ စကားလုံးရဲ့ အဓိပ္ပါယ်ကိုတောင် စစ်စစ်ပေါက်ပေါက် အရေးတယူရှိလှတဲ့ NLD ဟာ ဆန္ဒမဲလက်မှတ်မှာ ဖယောင်း သုတ်ထားပါတယ်ဆိုပြီး စွတ်စွဲပြောဆိုတာဟာ ဒီစွတ်စွဲချက်ရဲ့ အဓိပ္ပါယ် အတိမ်အနက် သက်ရောက်မှုကို မသိဘဲပြု လုပ်တာတော့ မဟုတ်လောက်ပါဘူး။ အကျိုးဆက်အနေနဲ့ မြန်မာနိုင်ငံမှာ ပြုလုပ်နေတဲ့ ပြုပြင်ပြောင်းလဲမှုတွေ၊ တိုင်းရင်းသား စည်းလုံးညီညွှတ်မှုတွေကို ဂယက်ရိုက်ခတ် သွားစေနိုင်ပြီး နိုင်ငံတကာရဲ့ မြန်မာနိုင်ငံအပေါ် ထားရှိတဲ့ သဘောထားတွေကိုလည်း NLD ရဲ့ ဒီလုပ်ရပ်ကြောင့် တစ်မျိုးတစ်ဖုံ ပြောင်းလဲသွားစေနိုင်တယ်မို့  သိသိကြီးနဲ့ ဒီလိုမဟုတ်မမှန် စွတ်စွဲခဲ့တာဆိုရင်တော့ ပြည်သူအပေါ်ထားရှိတဲ့ NLDရဲ့သဘောထားအမှန်ကို ပြန်မေးကြည့် ရမလိုဖြစ်နေပါပြီ။
အချိန်အခါအရ အပြောင်းအလဲကို အရမ်းတပ်မက်နေခဲ့တဲ့ ပြည်သူလူထုရဲ့ မဲပေးမှုကြောင့် ပြီးခဲ့တဲ့ ကြားဖြတ်ရွေးကောက်ပွဲမှာ NLD အနေနဲ့ မဲဆန္ဒနယ် အများအပြားကို အနိုင်ရခဲ့တယ်ဆိုတာ ငြင်းမရတဲ့ အမှန်တရား ဖြစ်ပါတယ်။ ဘယ်ပါတီကပဲနိုင်နိုင် ပြည်သူလူထုက အမှန်တကယ် ရွေးကောက်တင်မြှောက် လိုက်တဲ့ ပြည်သူ့ ကိုယ်စားလှယ်တွေကို မှန်ကန်စွာ ရွေးချယ်နိုင်ခဲ့တာမို့ ၂၀၁၂ ခုနှစ် ဧပြီ ၁ ရက်နေ့ ကြားဖြတ် ရွေးကောက်ပွဲဟာ ဒီမိုကရေစီ အနှစ်သာရကို တင်းပြည့် ကျပ်ပြည့် ဖော်ညွှန်းနိုင်ခဲ့တဲ့ ရွေးကောက်ပွဲဖြစ်တာမို့ ဝမ်းသာမိပါတယ်။ သန့်ရှင်းစွာ ယှဉ်ပြိုင်ကြတဲ့ ဒီလိုအချိန်မှာ တစ်ဖက်သားကို မမှန်သတင်းနဲ့ အပုတ်ချဖို့ ကြိုးတာဟာ သိက္ခမရှိတဲ့ လုပ်ရပ်ဖြစ်ပါတယ်။ ပြည်သူ့ အကျိုးအတွက် နှစ်ရှည်လများ ရပ်တည်မယ့် ပါတီတစ်ခုအနေနဲ့ ပြည်သူတစ်ရပ်လုံးရဲ့ ယုံကြည်မှုကို လိုရာဆွဲပြီး အမြတ်ထုတ်ဖို့ ကြိုးစားတာဟာ နိုင်ငံရေးသိက္ခာ လုံးဝမရှိတဲ့ လုပ်ရပ်ဖြစ်ပါတယ်။ နောက်ပြီး မြန်မာနိုင်ငံ ပြည်တွင်းရေး၊ တိုင်းရင်းသား စည်းလုံးညီညွတ်ရေးနဲ့ နိုင်ငံတကာ ဆက်ဆံရေးတို့ အတွက် အရှိန်မြှင့် လုပ်ဆောင်နေချိန်မှာ ဒီလိုထင်ယောင် ထင်မှားသတင်းနဲ့ တိုက်ခိုက်တာဟာ သဘောထားမမှန်တဲ့ မရိုးမသား လုပ်ရပ်တစ်ခု ဖြစ်တာကြောင့် တစ်ကယ်လို့များ ဒီကြားဖြတ် ရွေးကောက်ပွဲမှာ NLD ပါတီက အနိုင်မရရှိခဲ့ရင် ဆိုတဲ့ အတွေးနဲ့များ ကြိုတင် စီမံထားတာများ ဖြစ်နေမလားလို့ ထင်ချင်စရာကြီး ဖြစ်နေပါတော့တယ်။ ဒါကြောင့် NLD ပါတီအနေနဲ့ နိုင်ငံအကျိုး ပြည်သူအကျိုးကို တကယ်သယ်ပိုးဖို့ ရည်ရွယ်ထားတယ်ဆိုရင် နောက်နောင် ရွေးကောက်ပွဲများမှာလည်း အရိုးသားဆုံး ယှဉ်ပြိုင်တက်အောင် သင်ယူဖို့ လိုအပ်နေပြီဖြစ်ပါကြောင်း ရေးသားတင်ပြလိုက်ရပါတယ်။
မျိုးချစ်မောင်

0 ဦးကဆွေးနွေးသွားပါတယ်..

Отправить комментарий