ဇုလိုင်လ ၂၅ ရက်နေ့က ပြည်ထောင်စုဝန်ကြီး ဦးအောင်ကြည်နှင့် ဒေါ်စုကြည်နှင့်တို့ ဆွေးနွေးပွဲ အပြီးတွင် နှစ်ဘက်စလုံးက အပြုသဘော ရှုမြင်ပြီး ကျေနပ် အားရမှု ရှိကြောင်း၊ ပြည်သူလူထု ကိုယ်စိတ်နှစ်ပါး ချမ်းသာစေရေးအတွက် နှစ်ဘက် ပူးပေါင်း ဆောင်ရွက်နိုင်မည့် အခွင့်အလမ်းများကို ဆွေးနွေးခဲ့ကြကြောင်း သတင်းများတွင် ဖော်ပြထားတာကို တွေ့ရှိရတဲ့ အတွက် နိုင်ငံသား တစ်ယောက် အနေဖြင့် မှန်ကန်တဲ့ အမျိုးသား ရင်ကြားစေ့ရေးကို ဖော်ဆောင် နိုင်ရေးကို မျှော်တွေးလို့ လွန်စွာ ဝမ်းမြောက်ဝမ်းသာ ဖြစ်မိပါသည်။ သို့သော်လည်း အချို့သော ပြည်တွင်း ပြည်ပ အဖွဲ့အစည်း တစ်ချို့က မလိုလား မနှစ်မြို့သော အသံများဖြင့် ပြောဆို ဝေဖန်နေမှုများ၊ အပျက်သဘော ဆောင်သည့် ပြောဆိုနေမှုများ ရှိသည်ကိုလည်း တွေ့ရှိရသဖြင့် နိုင်ငံရေးကို ခုတုံးလုပ် ကိုယ်ကျိုးရှာ လိုသူတွေ ရှိနေသေးတာကို တွေ့ရပြန်ပါသည်။
နိုင်ငံတော်ဘက်က သဘောထား ကြီးစွာဖြင့် ယခုကဲ့သို့ တွေ့ဆုံဆွေးနွေးမှု ပြုလုပ်ပေးခြင်းကို ဒေါ်စုကြည် ဘက်က မှန်မှန်ကန်ကန် တွေးခေါ်တတ်ပြီး မှန်ကန်သည့် လမ်းကြောင်းကို ရွေးချယ်ပြီး သူမနှင့် သူုမ၏ ပါတီအတွက် ခိုင်မာသည့် ရပ်တည်မှု တစ်ခုကို တရားဥပဒေနှင့် အညီ လုပ်ဆောင် သွားမည်ဟု ဆုံးဖြတ်နိုင်မည် ဆိုလျှင် နိုင်ငံတော်က ဖော်ဆောင်နေသည့် ဒီမိုကရေစီ လမ်းစဉ်တွင် ပူးပေါင်းပါဝင် လာမည့် လမ်းစပေါ် ရောက်ရှိ လာနိုင်သည်ဟု သုံးသပ်နိုင် သော်လည်း နည်းမှန်လမ်းမှန် မစဉ်းစား မသုံးသပ်ပဲ အတ္တကိုသာရှေ့တန်းတင်ပြီး ထိပ်တိုက်ရင်ဆိုင်ရေးကိုသာ ဆက်လက် စွဲကိုင်ထားမည် ဆိုပါက ဒေါ်စုကြည်နှင့် NLD တို့အတွက် စစ်မှန်သည့် ဒီမိုကရေစီတို့မှာ ပိုပြီးဝေးကွာ သွားနိုင်ပါသည်။
ယခုကဲ့သို့ တွေ့ဆုံ ဆွေးနွေးမှုကသာ ဒေါ်စုကြည် အစဉ်အမြဲ ပြောဆိုနေသည့် အမျိုးသား ရင်ကြားစေ့ရေးကို ဦးတည်နိုင်မှာ ဖြစ်ပါသည်။ မြန်မာနိုင်ငံ၏ ယခုကဲ့သို့ ဒီမိုကရေစီ အသွင် ကူးပြောင်းမှု လုပ်ငန်းတွေကို အင်တိုက် အားတိုက် ဆောင်ရွက် နေချိန်မှာ အမျိုးသား အကျိုးစီးပွားကို လိုလားသူတိုင်းဟာ မိမိတို့ နိုင်ငံနဲ့ လူမျိုးအပေါ် ထားတဲ့ စေတနာမှန်ကို လုပ်ဆောင်မှုနဲ့ သက်သေပြဖို့ အကောင်းဆုံးသော အချိန် ဖြစ်ပါသည်။ ဒီလို သက်သေပြဖို့ ဆိုတာကလည်း နှုတ်ကနေ ပြောနေရုံ၊ စကားလုံး တွေနဲ့ အချိန်ကုန်နေရုံနဲ့ မပြီးပါဘူး။ ဒီမိုကရေစီ နည်းလမ်းကျကျ လက်တွေ့ လုပ်ဆောင်မှုတွေ၊ ဒီမိုကရေစီ လမ်းစဉ် ပိုမို ထိရောက် အောင်မြင်အောင် ပူးပေါင်းပါဝင် လုပ်ဆောင်မှုတွေနဲ့ သက်သေ ပြကြရမှာ ဖြစ်ပါသည်။
နိုင်ငံရေးပါတီ တော်တော် များများဟာ သူတို့တွေရဲ့ စိတ်ရင်းတွေကို နိုင်ငံနဲ့ လူမျိုးရဲ့ ဒီမိုကရေစီ ဖော်ဆောင်မှု တွေမှာ ပူးပေါင်း လုပ်ဆောင်မှုတွေနဲ့ သက်သေ ပြခဲ့ကြပြီး ဖြစ်လို့ ကျန်ရှိနေသေးတဲ့ နိုင်ငံတော်အပေါ် စေတနာမှန်တဲ့ အခြားသော ပါတီတွေ အင်အားစုတွေ အနေနဲ့ ကလည်း နိုင်ငံနဲ့ လူမျိုးရဲ့ ဒီမိုကရေစီ ဖော်ဆောင်မှုတွေမှာ ပူးပေါင်း ပါဝင်လာဖို့ နိုင်ငံတော် ကလည်း အစဉ်အမြဲ လမ်းဖွင့်ထားပြီး ဖြစ်ပါသည်။
နိုင်ငံတော်ရဲ့ ရှင်းလင်း ပြတ်သားတဲ့ သဘောထားတွေကို ပြည်ထောင်စု သမ္မတ မြန်မာနိုင်ငံတော် အစိုးရသစ်ရဲ့ သမ္မတကြီး နိုင်ငံတော် တာဝန်ကို စတင် တာဝန်ယူပြီး ပထမဆုံး ပြောကြားခဲ့တဲ့ မိန့်ခွန်းမှာလည်း “အထူးသဖြင့် မြန်မာ့ နိုင်ငံရေးမှာ အစဉ်အလာလို ဖြစ်နေတဲ့ အစိုးရနဲ့ အတိုက်အခံဆိုတဲ့ ပဋိပက္ခ အသွင်ဆောင်တဲ့ အမြင်သဘောထား များကို ကိုင်စွဲခြင်း မပြုဘဲ အမျိုးသား အကျိုးစီးပွား အပေါ် အခြေခံပြီး လုပ်ဖော်ကိုင်ဖက်များ အဖြစ် သဘောထား လက်တွဲဆောင်ရွက် သွားကြဖို့လည်း အားလုံးကို တိုက်တွန်း လိုကြောင်း” ဖြင့် အတိအလင်း ပြောကြားခဲ့ပြီး ဖြစ်ပါသည်။
နိုင်ငံနဲ့ တိုင်းပြည်အတွက် ပြည်သူပြည်သားတွေ အတွက် အကျိုးပြုဖို့ စဉ်းစားတယ် ဆိုရင် ပြည်သူတွေ မျှော်လင့်နေတဲ့ ငြိမ်းချမ်းရေးလမ်း၊ နိုင်ငံတော်က ဖွင့်ထားတဲ့ ပူးပေါင်း ဆောင်ရွက်ရေး လမ်းကြောင်းအတိုင်း လျှောက်လမ်းဖို့သာ အဓိက ဖြစ်ကြောင်း ပြောလိုပါတယ်။ ထို့အပြင် ပြည်သူတွေ ကိုယ်စိတ်နှစ်ပါး ချမ်းသာစေမယ့် ရလဒ်တွေကို ယခု တစ်ကြိမ် အပါအ၀င် နောက်ထပ် ဆွေးနွေးမှုတွေ ကနေ အမြန်ဆုံး ပေါ်ပေါက်လာစေဖို့ ဆန္ဒပြု လိုက်ရပါသည်။
ဆည်းဆာ
0 ဦးကဆွေးနွေးသွားပါတယ်..
Отправить комментарий