ပြည်ထောင်စု သမ္မတမြန်မာနိုင်ငံတော် အစိုးရအနေနဲ့ တိုင်းပြည်နဲ့ ပြည်သူလူထုရဲ့ အကျိုးစီးပွားကို အစဉ် ထာဝရ အလေးထား ဆောင်ရွက်နေတယ်ဆိုတာ အပြော မဟုတ် အလုပ်နဲ့ အစဉ်အမြဲ သက်သေပြလျက်ရှိပါတယ်။ ဒီလို လုပ်ဆောင်ရာမှာ တိုင်းပြည်ရဲ့ လုံခြုံရေး၊ တည်ငြိမ်အေးချမ်းရေး၊ နိုင်ငံသူ နိုင်ငံသားများ အေးချမ်းစွာ အသက်မွေး ၀မ်းကြောင်းပြုနိုင်ရေးကို ဘက်စုံ ဒေါင့်စုံကနေ ကြည့်မြင် သုံးသပ် ဆုံးဖြတ် လုပ်ကိုင်လျက်ရှိပါတယ်။
ပြောင်းလဲလာတဲ့ ခေတ် စနစ်တွေနဲ့ အညီ တိုင်းပြည်ရဲ့ အုပ်ချုပ်ပုံ စနစ် အစိုးရရဲ့ နိုင်ငံသားတွေ အပေါ် စေတနာထားမှုတွေဟာ လက်တွေ့ကျပြီး မဆိုင်းမတွ ဖြေရှင်း ဆောင်ရွက်နေတာလည်း အားလုံး မျက်မြင် ကိုယ်တွေ့ ဖြစ်ပါတယ်။ နိုင်ငံ တစ်နိုင်ငံရဲ့ အရေးကိစ္စတွေကို ဆောင်ရွက်ကြရာမှာ အမြဲတမ်း ဖြောင့်ဖြူးသာယာတဲ့ ပန်းခင်းလမ်းကို ချောချော မွေ့မွေ့ လျောက်လှမ်း ရသလိုမျိုးတော့ လွယ်ကူလှတာ မဟုတ်ပါဘူး။ ဥုံဖွဆိုပြီး ဘာဖြစ်စေ ညာဖြစ်စေ ဆိုတဲ့ အတွေးမျိုးတွေနဲ့ ချက်ချင်းလက်ငင်း တဲပေါ်ကနေ တိုက်ပေါ်ရောက် လူမှုဘ၀တွေ ခုန်ပျံကျော်လွှား မြင့်တက် သွားအောင် လုပ်ဖို့ဆိုတာ နိုင်ငံတော် အစိုးရရဲ့ တာဝန်ချည်းပဲလည်း မဟုတ်ဘူးဆိုတာ အားလုံးသော ပြည်သူတွေနဲ့ အကြောင်းအမျိုးမျိုးပြပြီး အစိုးရကို စွပ်စွဲ ပုတ်ခတ် ပြောဆိုနေတဲ့ နိုင်ငံရေး Hero ကြီးတွေလည်း သိဖို့ အထူးလိုအပ် လှပါတယ်။
ပြောင်းလဲလာတဲ့ အခြေအနေတွေကို အပြုသဘောဆောင်ပြီး ပူးပေါင်းဆောင်ရွက်ခြင်းနဲ့ တိုင်းပြည်ကို မေတ္တာ စေတနာလေးတွေထားပြီး စစ်မှန်တဲ့ လူသာဓုခေါ် နတ်သာဓုခေါ် လုပ်ရပ်မျိုးတွေနဲ့ ပြည်သူနဲ့ နိုင်ငံတော်ကို အလုပ်အကျွေးပြုတာဟာ တကယ့်ကို နိုင်ငံချစ်စိတ် မျိုးချစ်စိတ်နဲ့ မြန်မာနိုင်ငံသား ပီသသူအဖြစ် ရပ်တည် နေထိုင်ခြင်းမျိုးလို့ ဆိုရမှာ ဖြစ်ပါတယ်။
မွှေးပျံတဲ့ လှပတဲ့ ပန်းတစ်ပွင့်ရဖို့ဆိုရင် ကိုယ်တိုင် စိုက်ပျိုးယုယပြီးမှ ဖြစ်လာ ပွင့်လန်းလာတဲ့ ပန်းလေးကို ကြည့်ရှု ခံစားတာ၊ ဘုရားတင်လှူ ကုသိုလ်ပြုရတာထက် ကြည်နူးစရာကောင်းတဲ့ ခံစားချက် ပီတိမျိုးကို ယဉ်ကျေးသိမ်မွေ့တဲ့ မြန်မာနိုင်ငံသားများပီပီ ခံယူတတ်ကြဖို့ လိုတဲ့ အချိန်ကို ရောက်နေပါပြီ။ အမြဲတမ်း ခါချဉ်အုံ တုတ်နဲ့ ထိုးပြီး ရုန်းရင်းဆန်ခတ်ဖြစ်ပါမှ မတည်မငြိမ် ဖြစ်ပါမှ အပြောင်းအလဲ ရမယ်လို့ ယူဆတဲ့ လမ်းဟောင် လမ်းအို အတွေးအခေါ် ခပ်နွမ်းနွမ်းတွေကို ခ၀ါချသင့်တဲ့ အချိန်လည်း ရောက်နေပါပြီ။ ဆူပူကြ သေကြေကြ ပျက်ဆီးကြ မတည်မငြိမ် ဖြစ်ကြ ကျီးလန့်စာစား နေကြရ အချင်းချင်း မယုံမကြည် ဖြစ်ကြရတဲ့ အခြေအနေတွေဟာ ဒီမိုကရေစီရဲ့ စံနှုန်းတွေ အသီးအပွင့်တွေ မဟုတ်ပါဘူး။
အချင်းချင်း တိုင်ပင်ကြ နှီးနှောကြ ဖြေရှင်းကြခြင်းသာလျင် ဒီမိုကရေစီရဲ့ ကနဦးအစ ခြေလှမ်းပဲ ဖြစ်ပါတယ်။ ပြဿနာရပ်တိုင်းမှာ အဖြေဆိုတာ ရှိစမြဲပါ။ အဲဒီ အဖြေကို အေးအေးချမ်းချမ်း တည်တည်ငြိမ်ငြိမ်နဲ့ ပျော့ပြောင်း ညင်သာမှုတွေကို လက်ကိုင်ပြုလို့ တစ်ဆင့်ခြင်း ပြောင်းလဲ ပြင်ဆင်သွားခြင်းဖြင့် ပေးသူ ယူသူ စိတ်ကြည်ဖြူရမယ့် အလုပ်မျိုးကို အားလုံးက မျှော်လင့်ထားပြီးသားပါ။ သွေးခွဲတယ်၊ သပ်လျှိုတယ် ဆိုတာလည်း အကြောင်းအရာ တစ်ရပ်အပေါ်မှာ ထောက်ပြပြီး မြှောက်ထိုးပင့်ကော် လုပ်နေသူတွေ သူတို့ အကျိုးစီးပွားအတွက် ဘေးတီးနေသူ တွေရဲ့ သမရိုးကျ မဟာဗျူဟာ တစ်ခုပါ။ အဲဒီ ဗျူဟာကို သိသိရက်နဲ့ ကျွန်တော်တို့ ကျွန်မတို့ အသုံးချခံ အဖြစ် စတေးပေးကြရတာ တကယ်ကို မတန်လှပါဘူး။
သွားချင်တဲ့ ခရီးပန်းတိုင်က အတူတူပါ။ ဒီမိုကရေစီ လိုလားတာ၊ ပြည်သူတွေရဲ့ လူမှုစီးပွား ဘ၀ အမြန်ဆုံး ဖွံ့ဖြိုး တိုးတက်စေလိုတာ နိုင်ငံရဲ့ စီးပွားရေး၊ လူမှုရေး၊ ပညာရေး၊ ကျန်းမာရေး ကမ္ဘာနဲ့ ရင်ဘောင်တန်းနိုင်လိုတာတွေဟာ အားလုံး တူညီတဲ့ ရည်ရွယ်ချက် ရည်မှန်းချက်တွေပါ။ ဒါကြောင့် အမြင်မှန် အတွေးမှန်တွေနဲ့ မွှေးပျံလန်းဆန်း လှပသော ပန်းလေးတွေ ပွင့်လန်းလာဖို့ မာန၊ အတ္တတွေကို လျှော့ကြလို့ အပင်ကို အသေအချာ နည်းမှန်လမ်းမှန် ပျိုးထောင် ပြုစုကြပါစို့လို့ တိုက်တွန်းတင်ပြလိုက်ရပါတယ်။ မျိုးချစ်မောင်
0 ဦးကဆွေးနွေးသွားပါတယ်..
Отправить комментарий